World Inline Cup (WIC) 係一個馬拉松巡迴賽，以前我冇諗過自己會參加呢個比賽，因為其實我以前係一個短途選手，如果你有睇過另外一篇文章就會明白點解我而家會愛上玩馬拉松。
其實係好耐好耐以前 (2006年) 我已經接觸過WIC呢一個比賽，不過係其中一個分站，而呢個比賽亦都係我人生第一個馬拉松比賽。我係比完嗰場馬拉松之後先至知道原來我參加咗 WIC。
WIC 其實佢可以當係幾個個別嘅比賽嚟睇，而每個 Class 1 比賽頭20名就會有分，Top Class 比賽頭 50 名有分。五站裏面要完成最少三站再加埋有分就可以上榜。所以其實係可以跑晒五站1分都冇，玩完之後榜上無名。亦可以你贏咗兩站好高分，但只係完咗兩站，你的分數最後會「清零」都係榜上無名。
我一向決定玩嘅話都會玩到好盡，所以就想搵咗一個時機，公司容許我行開一下，而自己有一定戰鬥力嘅情況之下，嘗試搵一年去參加晒五站，希望有分最後將自己個名留喺WIC個榜上面。
我好清楚自己乜實力，要贏嘅機會率係等於零，我個目標好明確，就係最後個榜上有自己個名。結果，2024年我就參加咗成個系列嘅比賽。
呢一屆比賽分別就係
- 2/6/2024 FUNCHAL
- 9/6/2024 RENNES
- 10/8/2024 Harbin
- 17/8/2024 BERN
- 28/9/2024 BERLIN
2024年係我三字頭最後一年，所以WIC係其中一個計劃。(其他計劃可到這裡)，而可能年紀大咗，傷患亦開始多咗。基本上成年我都係一個受傷嘅狀態，唔好話訓練，要「唔痛」都要好彩先有機會。識我嘅人都知，我會為一件我要做嘅事而準備，今次我都照準備咗成年，不過唔知點解每一次比賽前都仲有事發生！舊年廿四小時比賽之前，腳掌受傷，好彩最後都叫做好得切。今年都唔例外，大約最後一個月訓練時搞傷膝頭，應該要加強訓練嘅時候，就偏偏要減少訓練。比賽前10日再黎舊患復發，急性發炎，唔好話行路，連落床都痛。所以呢10日我做治療仲多過行路，唔好話去練……紅外線、EMS、拉筋、推拿、按摩、泵腳、針灸、冷雷射、熱雷射、磁療、超聲波、衝擊波、電療….基本上有乜嘢可以做到做晒…..原本計劃得好好的訓練，到最後一個月變成完全荒謬到出發前呢一刻仲未搞好，不過無論如何都係嗰句「去盡無悔」！又要睇吓我呢隻爛船仲有冇3分釘
要完成五站唔難，但係要有分就變咗好難。其實當我決定2024年做呢個 Project時，我係未受傷的，哈哈。
第一站 葡萄牙外島 FUNCHAL
只差一點點就有分，頭20名有分我剛好第21名。上天可能都睇唔過眼，最後原來呢個比賽有分 master 組，我係 master 組得到咗第二名。頭兩站只有一星期距離，而又係歐洲，所以我決定唔返香港而去英國休息和回復一個星期。
第二站法國 Rennes
呢站就唔係只差一點點，我個傷開始惡化，因為要就住對腳，基本上呢一站跑得好奇怪，完全做唔到平時做嘅動作，最後只係勉強完成。不過可能唔知係我黑仔定注定，第一站就爭一個名有分，而第二站其實以我完成時間放去2023年同比賽的成績的話，我係第15名。哈哈！
第三站 中國 哈爾濱
呢個地方應該係我人生去得最北嘅地方，呢一站天氣係一個關鍵，我所選用嘅轆可以話係「遇水即死」，但係乾地就會好快，所以我決定搏一搏。由開賽至到中段，基本上我好有把握可以一個好好嘅名次，但係去到中段開始落雨，世界上最遙遠嘅距離就出現，我套轆其實已經推唔到，每推一步對手就遠離一步。呢一個感覺係最難受，明明有力但快唔到，明明跟得好好但一步一步被放遠。結果第30名完成。因為哈爾濱站係 top class 賽事，所以我都叫有分。而完成之後，已經有分同完成三站，理論上我已經「榜上有名」。
第四站 瑞士 BERN
呢個比賽亦係我瑞士之旅嘅開頭，呢一站我可以用山賽去形容呢一場比賽。賽道有一條超級斜路，又有一條超級大落斜。一場比賽比賽前已經預測天氣不穩，加埋斜路危險，所以大會將比賽減半由42公里減到21公里，結果好辛苦上上落落之後終於跑完，呢一個比賽段上斜唔好話滾，連行上去都好吃力。
第五站 最終站 德國 柏林
最終站亦都係我最鍾意嘅柏林，柏林馬拉松一向都係WIC最後一站，而 Berlin 係 TOp class 賽事，頭50名有分。但柏林係全世界最高水平同最多人參加的比賽，我只可以盡力，希望可以打入頭50將名次推高。
今次被大會列為精英跑手，可以跑A槍。但係我同大部份A槍嘅人一樣決定落B槍大戰，今年係一條新賽道，一路我都跟在主車隊，但係去到收窄路段同女子車隊會合，會合之後位置好有限，推唔到大步又俾佢地頂一頂，搞到被頭車拋離咗少少之後就追唔返上去，最後我哋60名完成比賽。
經過超過半年嘅賽事，飛過半過地球。結果我等15名完成，成功榜上有名，達到我個人目標！
